Madaxtooyada Somaliland oo lagu eedeeyey afduubasho ganacsi iyo dheeliga dhaqaale ee ay keentay

Dhaqaalaha Somaliland ayaa sii liicaya kaddib markii ay soo wajaheen caqabado uga imaanaya madaxtooyada Somaliland, xilli qaar kamid ah ganacsatadii iyo ganacsigiiba Dekedda Berbera lagu xasaradeeyey, qaar kalena ganacsigoodii ay kalaba wareegeen Berbera.

Dhacdooyin isbiirsaday oo isdabayaala isla markaana caqabado ku ah ganacsatada Somaliland ayaa dibadda keeney natiijada dhaqaalaha sii liicaya, iyadoo dhacdooyinkii ugu danbeeyey ay warinayaan walaahowga laga muujinayo madaxtooyada Somaliland oo lagu eedaynayo u xaglinta dad ay xidid iyo xigaalo yihiin, kuwaas oo danohooda dartood loo mijaxaabinayo wixii dhaqdhaqaaq ganacsi ee aanay iyagu ku lug lahayn.

Laba markab oo shidaal siday oo is xigxigay ayaa dib looga celiyay furdada Berbera, kaddib markii ganacsade uu soddog u yahay Muuse Biixi ay madaxtooyadu ka saacidday in uu si awood muquuqnin ah suuqa uga saaro ganacsatada kale ee shidaalka keena. Shirkadda Shiraaqle oo markab shidaal u rarnaa ayaa dib looga celiyey Berbera, waxa ayna maamulka shirkaddu muujiyeen walaaca ay ka qabaan shaqsiyaad si gaar ah ganacsiga loogu xidhayo inay sababi doonaan sicir barar baahsan oo sii laba-lixaadiya xasaradaha dhaqaale ee maanta ka taagan Somaliland, sababeystana dagaalka Laascaanood.

Dhaqaalaha Somaliland waxaa kale oo sii liiday wareegga ganacsatada ka soojeeda Puntland iyo kuwa Dawladda Deegaanka Soomaalida (DDS) oo ka wareegay Berbera, una wareegay furdooyinka Bossaso iyo tan cusub ee Garacad iyo waliba Jabuuti.

Ku ammartaaglayn iyo afduubasho dhaqaale, awood sheegasho shaqsiyeed, iyo diidmada soojeedinta salaadiinta iyo bulshada rayidka ah ayaa ganacsatada Somaliland ku eedeynayaan in ay caado u noqotay madaxtooyada Hargeysa, waana tan galbatay bay isla ganacsataan leeyihiin deganaanshihii dhaqaale, amni, iyo tii bulsheed ee Somaliland, iyadoo laga dardaar-weriyey jihada burbur ee ay Somaliland xilligan foodda saartay.

Diiwaanka Wararka | Daljir Media