Laascaanood, November 02 2023:- Hoggaamiyaha Maamulka SSC-Khaatumo Mud. Cabdiqaadir Aw-Cali ayaa shir guddoomiyey kulankii 4aad ee Golaha Fulinta Maamulka.
Kulanka waxaa qayb ka ahaa Hoggaamiye Ku xigeenka Maamulka SSC-Khaatumo Dr. Maxamed Cabdi Ismaaciil iyo Xoghayeyaasha Golaha Fulinta Maamulka.
Ajandaha kulanka ayaa ahaa dib-u-eegista wixii ka qabsoomay awaamiirtii ka soo baxday kulankii hore ee Golaha Fulinta, iyadoo sidoo kale diirrada la saaray amniga iyo difaaca deegaannada Maamulka SSC-Khaatumo.
Hoggaamiyaha ayaa Golaha faray dedejinta xeerarka iyo qorsheyaasha hortebinta u leh maamulka sida amniga iyo difaaca, maaliyadda, caafimaadka, waxbarashada iyo horumarinta dhaqaalaha.
Hoggaamiyaha ayaa Shacabka SSC-Khaatumo ugu baaqay in ay diyaar u ahaadaan in ay ka qayb qaataan ilaalinta amniga gudaha iyo difaaca deegaannada Maamulka SSC-Khaatumo, isagoona ku boorriyey garab-istaagga ay markasta u muujiyaan ciiddammada difaaca iyo kuwa amniga gudaha ba.
FAALLOOYIN & FALCELIN