Muuqaalo argagax leh ayaa laga soo qaaday garoonka diyaaradaha ee Kabul iyada oo dadka ka quustay waddanka ay isku dayayaan in ay cararaan kadib qabsashadii caasimada Afgaanistaan ee Taliban.
Dad goobjoogayaal ah ayaa sheegay in ugu yaraan saddex qof oo rayid ah ay ku dhinteen fowdada garoonka, oo ay ammnigiisa sugayaan ciidamada Mareykanka.
Duulimaadyadii ganacsiga ayaa inta badan la hakiyay, iyadoo ay garoonka ku xayirmeen boqolaal qof oo reer Afgaanistaan ah iyo dad kale oo ajaanib ah.
Mareykanka iyo dalal kale ayaa isku dayaya inay daad gureeyaan shaqaalaha iyo xulafadooda.
Kumanaan muwaadiniin Mareykan ah, shaqaalaha safaaradda iyo qoysaskooda, iyo sidoo kale “muwaadiniin Afgaanistaan ah oo nugul” ayaa diyaarad lagu qaadi doonaa maalmaha soo socda, ayaa lagu yiri war ka soo baxay dowladda Mareykanka.
Ciidamada Mareykanka, oo la wareegay gegida diyaaradaha iyagoo daad -gureynta magaalada ka sii socota, ayaa lagu soo warramayaa inay cirka u rideen qabado si ay u kala eryaan kummanaan kun oo qof oo isku guray garoonka diyaaradaha ee Kabul shalay iyo maantaba.
Afhayeenka ururka Taalibaan ayaa sheegay in aysan jiri doonin wax aargoosi ah oo lagula kici doono shacabka reer Afghanistaan.
FAALLOOYIN & FALCELIN