Ra’iisul Wasaare ku Xigeenka XFS Mudane Mahdi Maxamed Guuleed (Khadar) ayaa shir guddoomiyay shir looga hadlayay dooda iyo ansixinta tubta Horumarinta Arrimaha Bulshada iyo xarunta gar-gaarka deg-dega ah, shirka ayaa daba socday kulan ay yeesheen gudiga farsamada, waxaana diirada lagu saarayay tubta iyo siyaasadda lagu horumarinayo arrimaha bulshada, iyadoo uu Ra’isal Wasaare ku Xigeenka uu wasiirada mid mid u waydiiyay qorshe howleedka ay soo gudbiyeen in ay ku qanacsan yihiin.
Ra’iisul Wasaare ku xigeenka ayaa u ogolaaday in wasiirada ay ka wada hadli karaan howlaha ay wadaagaan, Waxayna wasiirada farta ku fiiqeen baahiyaha jira iyo sida ay suurto gal u tahay in si wadajir ah loo wajaho caqabadaha bushadeed ee ummadeena haysata kuwaas u baahan in xukuumada ay daboosho baahiyaha jira mustaqbalka dhow.
Dhanka kale la taliyayaasha xafiiska Ra’iisul Wasaaraha ayaa iyaguna ka talo bixiyay sida ugu haboon ee loo hormarin karo Arrimaha Bulshada iyagoo sheegay in ay ka faa’iidaysanayaan waayo aragnimadii ay ka heleen hirgalinta tubta siyaasada loo dhan yahay oo ay juhdi fara badan galiyeen.
Ra’iisul Wasaare ku xigeenka ayaa sheegay in Jadwal how-leedka isla xisaabtanka uu yahay geedi socodka lagu fududeenayo la socodk ashaqada ku qeexan tubta Horumarinta Arrimaha Bulshada oo ay wada leeyihiin hay’adaha qaybta ka ah gudi-hoosaadka golaha wasiiradda ee arrimaha bulshada oo u xilsaaran taaba galinta, qabsoomida iyo xaqiijinta fulinta qorshaha ku qeexan tubta.
Xafiiska Ra’iisul Wasaaraha wuxuu si joogta ah u xiriirin doonaa lana socon doonaa, xaqiijinta iyo daba galka in qorsha howleedka Horumarinta Arrimaha Bulshada ku qabsoomay Waqtiga hay’adaha loogu idmay iyo in uu ka caawiyo hay’adaha kala duwan caqabadaha kala soo gudbooonaada howlaha kala duwan.
FAALLOOYIN & FALCELIN