Siddeed askari oo ka mid ah ciidamada ilaalada madaxtooyada Jubbaland ayaa dhintay kadib markii maanta barqadii miino dhulka lagu aasay ay la qaraxaday gaari ay saarnaayeen.
Wararka ayaa waxa ay sheegayaan in gaariga ay miinada la qaraxaday uu ka mid ahaa kolonyo baabuur ahaa oo ciidamada Jubaland ay leeyihiin kuwaas oo marayay inta dhaxaysa magaalooyinka Afmadow iyo Dhoobleey ee gobbolka Jubada Hoose.
Ciidamadan ayaa ka mid ahaa kuwa ka qeyb qaadanayay xaqiijinta amaanka Dhoobleey mudadii uu halkaasi ku sugnaa Madaxweynaha Jubaland Axmed Madoobe iyo xubno uu hoggaaminayay oo maalmahaan booqasho ku joogay degmadaas.
Dhowaan ayaa Madaxweynaha Jubbaland waxa uu sheegay in uu bilaabayo weeraro ka dhan ah ururka Al-Shabaab oo ku sugan inta badan deegaanada gobolka Jubbada Dhexe iyo weliba qeybo ka mid ah gobolka Jubbada Hoose.