Madaxweynaha Maamul goboleedka Koonfur Galbeed C/casiis Xasan Maxamed (Lafta Gareen) ayaa sheegay in dhibaatooyinkii shalay ka dhacay magaalada Baydhabo iyo duleedkeeda ay qeyb ka ahaayeen ciidamo ka tirsan Milateriga.
Waxaa uu ku amray Saraakiisha Ciidamada inay gacanta ku soo dhigaan ciidamadii ka dambeeyay dilkii Ganacsade caan ah oo shalay lagu dilay duleedka Baydhabo.
Madaxweynaha Koofur Galbeed ayaa soo saaray amar ku aadan in hub lagu dhex qaadan karin gudaha magaalada Baydhabo, waxaana uu sheegay in Ciidamada xoogga dalka ay ku laabtaan xeryahooda oo aanay magaalada lagu arki karin.
“Kuwa dilalka iyo dhibaatada geystay ee sida xun u fikiraya waa kuwo ka tirsan ciidamada, in umadda ay dib ugu soo noqdaan oo dhib u geystaan waa wax aan la aqbali karin, kuwa gacan ku dhiiglayaasha gacanta ayaa lagu soo dhigayaa, si loo maxkamadeeyo”ayuu yiri Madaxweynaha Koofur Galbeed.
In ka badan shan ruux ayaa shalay siyaabo kala duwna loogu dilay magaalada Baydhabo iyo duleedkeeda, waxaana dilalkaas ay salka ku hayeen aanooyin qabiil ka dhashay is qabqabsi dhul la isku heystay.
U dhaaf Halcelis