12 Jan 2018 – Farriin qoraaleed nooga timid dhegayste Radio Daljir: “Intii Faroole ahaa Madaxweynaha Puntland dhibka dalka soo gaaray waa kala durugsanaa. Mudug darxumay la libiqsatay. Cayn cadow buu ka adeejiyey. Sool iyo Sanaag wuxuu ka dhigay seero laga guuray. Bari ciidan badeed booliis loogu yeeray iyo wiil buu ka adeejey. Laakiin Karkaar baa karkarisay!”
***
Farriin qoraaleedka kore waxa uu hordhac u ahaa qormo Daljir oo ku taariikheysaneyd 12 Janaayo 2018. Qormadaas oo cinwaankeedu ahaa “Dayaca iyo darxumada Faroole nala damacsanaa Gaas baa damiyey!” dib ugu noqon meyno, laakiin muhiimadda tan maanta waa in shacabka Puntland iyo kuwa Soomaaliyeedba aan xasuusino in waqtigu isbadalay oo qof kasta oo hoggaan soo qabta ama hayaaba uu taariikh leeyahay, ayna mudantahay in taariikhdiisa bannaanka la soo dhigo mar kasta oo uu masuulkaas damco in uu taariikhdiisii shalay na hilmaamsiiyo si uu tu cusub iyo tab kale ula yimaado.
Berri oo ku beegan 23ka Juun 2019, waxaa Xarunta Cilmibaarista ee PDRC ku casuman Oday Faroole oo ah Xubin Aqalka Sare ee Dowladda Federaalka Soomaaliya, horena u ahaa Madaxweynihii afraad ee Puntland. Bandhigga Faroole ayaa PDRC shaaciyey in uu diiraradda saarayo “Hannaanka Xisbiyada Badan ee Puntland iyo Xiriirka DFS.”
#SaveTheDate | 23 June, 2019 | Our 2nd PDRCTalks will host fmr #Puntland president Farole on "The Road to Multi-Party System and Managing Federal Dynamics" #PDRCTalks2019 #PDRCTalks #MultiPartySystemInPuntland pic.twitter.com/0z6y3i7Yra
— Puntland Development & Research Center (PDRC) (@SomaliaPdrc) June 20, 2019
Laakiin annaga oo aan hadalka dheereyn, su’aal mudan in la is weydiiyo baa waxa ay tahay, Faroole oo raadkiisu qoyanyahay, siyaasadda aynaan shalay ka baran, aan hoggaankiisu meelmarin, reer Puntland ka biyo-diideen, oo uu maanta shacabka Puntland ku wacdinayaa waa maxay?
Annaga oo maanka ku hayna in siyaasiyiintu ay xasuus dhowyihiin aan shacabka xasuusino waxa Faroole lagu xasuusto xilli xilleedkiisii Puntland iyo wixii laga dhaxlay:
- Gobolada Puntland oo Faroole uusan marnaba si siman Madaxweyne ugu noqon
- Waxa uu marooqsi u kordhistay xilli xileedka Puntland asaga oo dastuurkii Puntland oo qeexayey in Madaxweynaha Puntland uu xilka haynayo 4 sano u badashay 5 sano
- Waxa uu bilaabay hannaanka xisbiyada badan asaga oo dhammaan shaqaalaha Dowladda Puntland ku khasbay in ay ku biiraan xisbigiisii HORSEED ama ay shaqada ku waayaan (waxaa xusid mudan in uu magaca Horseed ka maroorsaday idaacaddii Horseed ee magaalada Bossaso, deedna uu albaabada isugu dhuftay, ciddii muran ka keenteyna xabsiga dhigay)
- Markii doorashadii Puntland la gaaray waxa uu soo diray santuukhyo qufulan iyo askar aad u hubeysan oo siiba loo diyaarshay magaalooyinka Gaalkacyo iyo Qardho. Qardho dhiig baa ku daatay, welina dhibkii ka dhashay taaganyahay; Gaalkacyo ayana xabbaddaa wiif tiri, laakiin khasaaruhu waa ka yaraa kii Qardho
Haddaba maxaa Faroole iyo xulufadiisii waagaas, maantana aan Buurta ka fogeyn, ku khasbay awood marooqsi intaas dhan?
Waxa kaliya oo la mala-awaali karaa waa awood uusan Faroole lahayn oo maalinkaas u bidhaantay, sida ay maanta Faroole ugu bidhaantay in shacabkii Puntland ee uu shalay qaar Qardho ku laayey, qaarna dabaqyada Gaalkacyo ka soo tuuray, ay ugu bidhaansantahay in uu uga wacdiyo hannaan dimoqoraadiyenta iyo xisbiyada badan. Waa bidhaansi dhalanteed ah.
Aan ku xijinno gunaanadkii qormada sannadkii hore ee 2018: “Dowladnimadu ma aha hawl sahlan. Ma aha mid la iska gaaro. Ma aha mid maalinna lagu dhaqmo, maalinna laga sii jeesto. Dowladnimadu waa gacan ku hayn. Dowladnimadu waa tusaale abuurid. Dowladnimadu waa aayaha dadka. Dowladnimada Puntland waa tan dadka ka soo qaxay Xamar iyo Koonfurta Soomaaliya illaa iyo Waqooyiba ay maanta magan u yihiin. Shacabka Puntland mar kale cadow magan uma noqon karaan, cadow-kalkaalna madax kama dhigan karaan.”
Sidaas darteed, Faroole oo maanta yiraahda aan dalka dimoqoraadiyeyno, oo xisbiyo badan dhidibno, oo xalaal-quudato noqo, oo sharciga ha la beegsado, waxba kama duwana asaga oo berri shacabweynaha Puntland u sheega “Sanaag xorowday e aan Sool ku xijino” iyo xoreyn aan afka wax uga danbeyn, sida dimoqoraadiyentiisa berrina ay u tahay hadal-tiro kale oo dhalanteed ah.
Saas oo ay tahay, shacabka Puntland weli waxa ay u oomanyihiin dimuquraadiyeyn, balse sidii ay shalay u diideen mid gacan-ku-rimis ah bay berrina u diidi doonaan, waana shacab kala sooci kara runta iyo beenta iyo waliba xaqa iyo baadilka.
Diiwaanka Daljir
Radio Daljir
22 Juun 2019
U dhaaf Halcelis