Ururka Alshabaab ayaa sheegay inuusan marnaba wax wada hadal ah la galidoonin dowladda federalka Soomaaliya, taas bedddelkeedna ay qorshaynayaan inay la wareegayaan xukunka dalka.
Hoggaamiye ku xigeenka ururka Alshabab, Cabdiraxmaan Maxamed Warsame oo loo yaqaano Mahad Karate, ayaa hadalkaan sheegay, kadib markii wareysigii ugu horreeyay uu siiyay warbaahinta Channel 4 ee laga leeyahay UK.
Dhowaan madaxweynaha Soomaaliya ayaa sheegay inuu wada hadal la furidoono Alshabaab, kadib marka ay dowladdiisa hoos u dhigto awoodda ay kooxdu haatan leedahay.
Mahad Karate oo Maraykanku uu dul dhigay shan million oo dollar, ayaa sheegay inaysan dowlad ka aaminsanayn dowladda Soomaaliya ee hadda ka jirta, wuxuuna sida uu aaminsan yahay sheegay inaysan wada hadal la galayn dowlad kasoo horjeeda shareecadda Islaamka.
“Anagga sideedaba nimankan dowlad kama aaminsanin. Cumuumana cid kasta oo ay shareecada ilaaheey noo diiday inaan la hadalno, la hadli mayno. Ciddii ilaaheey shareecaddiisa noo banaysay inaan la hadalno, waan la hadlaynaa,”ayuu yiri Mahad Karate.
Mahad Karate ayaa ku eedeysan inuu door muhiim ah ka qaatay weerarkii Jaamacadda Gaarisa ee sanadkii 2015-kii. Marka laga soo tago taas, weeraro ismiidaamin ah iyo dilal qorsheysan oo ka dhacay Soomaaliya, Kenya iyo dalal kale oo gobolka ah, ayaa la sheegay inuu ahaa maskaxdii ka dambeysay.
Abriil 10, 2015, wasaaradda arrimaha dibedda ee Maraykanka ayaa Karate u aqoonsatay inuu katirsan yahay Argagixisada caalamiga ah, waxaana la duldhigay shan million oo dollar.
Diwaanka wararka
Radio Daljir
FAALLOOYIN & FALCELIN